Mendiriz Mendi Elkartea - Hernaniko Mendi Taldea

HELDUEN IRTEERA

Malla Harria.

Malla Harria.:: mendirizmendi.com

Hurrengo irteera
Malla Harriara
Oriotik

mendirizmendi.com  | 01-12-2021

Industria ondarea eta natura elkarren ondoan dauden agertoki harrigarri bezain ikusgarria ezagutuko dugu.

Gaurko ibilaldi honetan, Gipuzkoako kostaldean dagoen ingurune harrigarri bezain ikusgarria ezagutuko dugu. Industria ondareak eta naturak bat egiten duten Malla Harriko —bertakoek Mollarri izenez ezagutzen dute— paisaiaz gozatu ostean, Iñurritzako biotopo babestua bisitatzeko aukera izango dugu.

Orioko portura doan errepidearen bidegurutzearen ondoan dagoen San Pablo ermitatik abiatuko gara. Gipuzkoako Birari (GR-121) dagozkion bide seinale zuri-gorriek erakutsiko diguten norabideari segituz, erraz helduko gara Txurruka aterpetxera. Mahastien artean mendebalderantz marrazten den errepidetik Talaimendiko leporaino igo, eta gertu dagoen kanpinaren aldera joko dugu. Kanpina kanpo aldetik pasa eta, Malla Harriko eraikinen hondakinen ondora ailegatuko gara . XIX. mendeko azken urteetan, Bizkaiko burdin meategietan izandako gehiegizko ustiapenaren ondorioz eta ustiatzeko teknologia berrien garapenak lagunduta, Belgikako, Frantziako eta Ingalaterrako konpainiek Gipuzkoako meategi esparruak begiz jo zituzten: Zerain, Mutiloa, Berastegi, Irun, Arditurri eta Andatzarratekoak. Leku honetako eraikuntzak tokiko meatzaritzaren lekuko harrigarriak dira. Andatzarratetik, aireko tranbiaren linea baten bidez, burdin mineralez betetako bagonetak eraikin hauetaraino iristen ziren. Garraio sistema horren bidez, zuzenean lotzen zituen karga eta deskarga lekuak. XX. mendeko lehen urteetan, Frantziara edo Ingalaterrara abiatzen ziren itsasontziek Malla Harriko zubi zamatzaile hauetan betetzen zituzten beren upategiak.

Gure historiaren pasarte hauek gogora ekarri eta gero, gure ibilbidearekin jarraituko dugu. Porlanezko bide zabaletik gorantz egin, eta, bat-batean, Zarauzko panoramika osoa zabalduko zaigu. Kanpinera doan bidea utzi, eta hondartza aldera jaisten den bidetik azkar galduko dugu altuera. Hondartzara pasatzeko dagoen zubia eskuinera utzi, eta ezkerretik ikusiko dugun pistatik aurrera egingo dugu. Gure eskuinean, Iñurritzako biotopo babestua izango dugu. Herrigunetik oso metro gutxira dagoenez, hasieran nekazaritzagatik eta gero hirigintzak ekarritako hazkundearengatik ia desagertu egin zen padura. Gaur egun zati txiki bat bakarrik geratu arren, hamaika hegaztiren pausaleku izaten da.

Abiapuntura itzultzeko lehen zatia nahikoa urbanoa gertatuko zaigu. Asti kirolgunera doan errepidetik abiatuko gara, eta, futbol zelaira iritsi aurretik, autobidearen azpitik zabaltzen den errepidea hartuko dugu. Metro batzuk aurrerago, eskuinera joko dugu, Sasikoa baserrirantz. Baserria atzean utzi, trenbidearen ondora iritsi, eta haren eskuinetik marrazten den lurrezko bidetik erraz iritsiko gara Orioko gainera. Errepidea gurutzatu, eta, baserriaren ondotik pasatzen den bideari jarraituz gain txiki batera igo, eta aldapa bizian azkar jaitsiko gara abiapuntura.

Izena emateko
Irteera abenduak 12an izango da, Atsegindegitik abiatuta, goizeko 8:00tan. Izena emateko edo zehaztasun gehiago izateko, elkarteko bulegotik pasa (Iturregi plaza z/g) astelehen, ostegun edo ostiralean arratsaldeko 8tatik 9tara. Izena emateko epea abenduaren 10ean amaituko da.

Oharra: Irteera goizekoa da. Eguerdirako bueltan izango gara.

Datu interesgarriak
Distantzia: 9 km
Denbora: 2,4 ordu
Desnibela: 350 m gorantz eta beste horrenbeste beherantz.
Beharrezko materiala: Mendiko material arrunta.

Mendiriz Mendi

Plaza Iturregi, s/n
20120 Hernani - Gipuzkoa
Tel.: 943 332 745

info@mendirizmendi.com

Info Montaña