Mendiriz Mendi Elkartea - Hernaniko Mendi Taldea

Usoko errekako bailara inguratzen duen ibilbideak Hernaniko hirigunea, Ereñotzu eta Usoko errekako bailararen ikuspegi bikainak ematen dizkigu. Aginagamendi, Urdaburu eta Igorin bezalako mendi inguruetatik igaro eta bertako bistez gozatzeko aukera ez ezik pagadi zahar, estazio megalitikoak eta Txirrita bertsolaria zenaren jaiolekua bertatik ikusteko aukera emango digu.

Informazio praktikoa: gaur egun ibilbide hau ez dago markatua. Hau dela eta, ez du bidea adierazten duen balizarik. Ibilbidearen ezaugarriak kontuan izanda, honen azalpen zehatza egiteko asko luzatuko ginateke, beraz, egingo dugun azalpenak, ipar horratza, altimetroa edo GPS-aren laguntza beharko du norabideak ondo hartzeko. Ura eramatea derrigorrezkoa da. Pagosardeko atsedenlekua geratu eta indarrak hartzeko gune zoragarria da. Zailtasun ertaineko ibilbidea da. Hasiera gogorra du eta igoera metatu nahiko handia, baina gainerakoan ibilbide benetan interesgarria da.Kontutan hartzekoa da ehiza garaian Akola-Igorin mendi lerroan harreta handiz ibili beharko dugula ehiza-postu ondotik pasatzerakoan.

Pagosardeko pagadia.

Malmazarko putzua.

Usokoerreka.