Mendiriz Mendi Elkartea - Hernaniko Mendi Taldea

HELDUEN IRTEERA

Urepele.:: mendirizmendi.com

Urepeletik Urkiagara, Red Ceroko kideen omenez

mendirizmendi.com  | 26-05-2025

II. Mundu Gerran aliatuak Portugalera pasatzeko eratutako ihes-sarea izan zen. Laguntzen parte hartu zuen kide bat Paquita Bretos izan zen. Irteera honekin bere ekarpena omendu nahi da.

Ibilbidea Kintoko baso magikoko eremutan kokatzen da. Kintoko basoa Europako pagadi garrantzitsuenetako bat da, eta erabateko erreferentzia Nafarroan. Ezin denez ustiatu, fauna eta flora aberatsa kontserbatzen ditu. Ibilbidea Fernando Aire Etxart “Xalbador” jaio zen Urepele herritik hasten da. Xalbador bertsolari liriko eta poetikoa izan zen bizitza, familia, baserria, fedea eta natura izan zituela bertsoetako gai, gehienetan melankolia puntu batekin.

Xalbadorrek Uztapiderekin zuen adiskidetasuna dela eta, 2023. urtean Zestoa eta Urepele arteko senidetze akordioa sinatu zuten. Beraz Mendiriz Mendik ipar eta hego aldeko bi herri xume, baina garrantzitsu horiek sinbolikoki elkartuko dituen ibilbidea antolatu du. Ibilaldi honekin ere Red Ceroko kideak omendu nahi dira. Bigarren Mundu Gerran Euskal Herriko Pirinioetan aliatuak Portugalera pasatzeko eratu zen ihes-sareari deritzo Red Cero. Parte hartu zuten pertsona guztiak (mugalariak, logistikaren arduradunak, aterpetxeetako jabeak eta abar) gogoratzeko eta memoria historikoa bizirik mantentzeko muga zeharkatzen duten mendiko irteerak antolatzen ditu noizbehinka Mendiriz Mendik. Sare horretan laguntzen parte hartu zuen horietako bat Paquita Bretos izan zen. Irteera honekin bere ekarpena omendu nahi da.

Datu interesgarriak
Eguna: Ekainak 8
Irteera ordua: Goizeko 8:30tan
Luzera: 12 km
Denbora: 4 ordu inguru.
Desnibela: 900 m gorantz eta 500 m inguru beherantz.
Zailtasuna: Zailtasun berezirik gabekoa.
Beharrezko materiala: Mendiko material arrunta.