Mendiriz Mendi Elkartea - Hernaniko Mendi Taldea

Helduen irteera

Balaitus eta inguruko mendiak:: .

Musales - Respomuso - Arremoulit

mendirizmendi.com  | 2026-06-29

Asteburu zoragarria Pirineotan. Balaitus mendia beti aurrean dugula Pirineotako paraje zoragarri hauetaz gozatzeko aukera peregabea izango dugu. Anima zaitez!

Ia urtero egiten dugun bezala, aurten ere Piriniotara hurbilduko gara bi egunetako irteera batean.

Uztailak 18
Atsegindegitik irten eta Sallent de Gallego herrira hurbilduko gara. Bertan dagoen La Sarra (1.500 m) urtegitik Musales lepora igoko gara Ibonciecho iboitik (2.200 m) pasatu ondoren. Lepotik gailurrera igotzen den bide estu bat irteten da. Bidea ertzetik igotzen da, baina ez du zailtasunik. Gailurreraino desnibel handia burutu behar da eta nahiko modu jarraian, baina lasai hartuta ondo egiten da.

Lepora itzuli eta iparralderantz jaitsi behar da. Lehenengo metroetan arreta jarri behar da, destrepe txiki bat baitago, baina erraza da. Gero, Respomuso urtegiaren ertzera iritsi arte, bidea erosoa da. Urtegia inguratuta, berehala gara aterpean.

Uztailak 19
Gosaldu ondoren Arrieleko iboietara hurbilduko gara eta bertatik, 250 m-ko desnibela eginez, Arremouliteko lepora. Hortik izen bereko aterpe eta lakura jaitsiko gara.

Aterpetik aurrera jarraitzeko bi aukera daude. Lehena Orteg-eko pasagunea zeharkatzea da. Ez da oso pasagune zaila, baina bai estua eta altuera sentsazio handikoa. Pasagunea kate batez hornituta dago modu seguruan pasatu ahal izateko, baina bertigoa duenarentzat ez da gomendatzen. Bigarren aukerak pasagunea ekiditen du. Bide eroso bat da, baina 200 m-ko desnibel gehigarri bat egitea suposatzen du.

Aukera bat edo bestea eginez, Arrious-eko lepoan elkartuko gara denok eta hortik 900 m-ko desnibela duen jaitsiera batetik autobusa dagoen tokira jaitsiko gara bide eroso batetik. Azken metroak baso barrutik egiten dira.

Izena emateko
Irteera Uztailaren 18 eta 19an izango da.
Irteera, larunbatean, 18an, goizeko 6:00tan izango da, betiko lekutik, Atsegindegitik.

Zehaztasun gehiago izateko eta izena emateko, elkarteko bulegotik pasa (Iturregi plaza z/g) astelehen, ostegun edo ostiralean arratsaldeko 8etatik 9etara.

Izena emateko epea uztailak 6ean irekiko da eta uztailak 16ean itxiko da. Izena emateko garaian 40 euro aurreratu beharko dira. Plaza mugatuak (25).

Nahitaezkoa da federatuta egotea.



Datu interesgarriak

Uztailak 18
Luzeera: 11 km
Denbora: 5 ordu.
Desnibela: 1.150 m inguru gorantz (gailurra eginez 150 m gehiago) eta 500 m inguru beherantz.
Zailtasuna: Desnibel handia. Lepotik jaisteko destrepe txiki bat.

Uztailak 19
Luzeera: 14 km
Denbora: 6 ordu.
Desnibela: 400 m inguru gorantz (Bigarren aukera eginez 200 m gehiago) eta 1.000 m inguru beherantz.
Zailtasuna: Orteg-eko pasagunea. Bertigoa dutenentzat ez da egokia. Horiek, 200 m-ko desnibel gehigarri batekin, bide eroso batetik egingo dute ibilbidea.
Beharrezko materiala: Mendiko material arrunta.

OHARRA: Aterpeetarako lo-zakua edota maindirea eta toalla eraman behar dira.